طريقة عمل الكابوتشا باللحمة المفرومة حاجة جديدة وغريبة برده مش كدا ولكن أحنا هنا بنعمل أيه بنخلي الأكل صحي على قد ما نقدر وفي نفس الوقت ننوع فيه ونغير من الأكل الصحي المتعارف عليه الممل واللي الناس كلها زهقت منه وممكن في ناس كمان مش بتاكل أكل صحي لمجرد أنها عرفة أن الأكل صحي أكل ممل وما فيش فيه تنوع ولكن هنا هنغير الفكرة تماما والسعرات الحرارية اللي فيه قليلة وهي 280 سعرة حرارية والدهون المشبعة 4 جم والكربوهيدرات 14 جم والبروتين 32 جم وبس يلي بينا على الطريقة.
مكونات طريقة عمل الكابوتشا باللحمة:
- كابوتشا
- لحمة مفرومة
- طماطم
- جزر
- مرقةدجاج
- زيت الزيتون
- بصل
- ملح وفلفل أسود
- بهرات لحمة
- جوزة الطيب
- قرفة
طريقة التحضير:
أول حاجة هتجيبي طاسة وهتحطيها على النار وهاترش رشة زيت زيتون وهتسبيها لغاية لما تسخن، ولما تسخن هتحطي اللحمة المفرومة وهتقلبيها لغاية لما تغير لونها ولما تغير لونها هتحطي بصلة متوسطة تكوني مقطعها مكعبات صغيرة وهتجبي جزر وبشرية وهتحطية وهتكوني ضاربه الطماطم في الخلاط ومتكثريش طماطم وهتحطيهم وهتحطي البهارات الأ وهي ملح وفلفل أسود وبهرات لحمة ومرقة الدجاج ورشة جوزة الطيب ورشة قرفة لو أنتي ما بتحبيش القرفة في الأكل عادي ممكن انك تشيليها أو تستبدليها ببابريكا وهتقلبي
وهتكوني بقى جايبة الكابوتشه الخضراء مش الحمراء وتقطعيها مكعبات وهتروحي واخداهم وهتروحي حطاهم مع اللحمة المفرومة وتقلبي وتروحي مغطياها وتسيبيها لغاية لما تستوي اللحمة المفرومة والكابوتشا كمان تستوي ولما تستوي هتجيبي طبق التقديم وهتحطيها فيها وبس كده لو أنتي عاملة دايت وعايزه تاكليها هي بس كده تمام وفيها عناصر كثيرة مفيدة أو لو أنتي بقى عايزة تعمليها مع شوربة أو أرز زي ما تحبي وبالهناء والشفاء لأكل اللحمة.
