طريقة عمل الرز بالفراخ الرز بالفراخ ده بقى أختراعي أنا اللي عملتة كنت قاعدة كده في يوم مش عارفة أعمل أكل أيه فقلت أجرب وكان قدامي فراخ ورز أنا ما كنتش عارفة أعملهم أيه وفي نفس الوقت كنت عاوزة أكلة تختصر وقت ما كنتش عايزة أعمل حاجات كثيرة والطريقة دي هي اللي طلعت معايا أتمنى أن طريقتي تعجبكم أن شاء الله ويلا بينا على الطريقة على طول.
مكونات طريقة عمل الرز بالفراخ
- أرز
- صدور فراخ
- زبادي
- لون طعام أحمر
- بهرات فراخ
- ثوم وبصل بودر
- بصل
- قرفة
- كركم
- زعتر
- ملح وفلفل أسود
طريقة التحضير
هتجيبي صدور الفراخ هتقطعيها مكعبات صغيرة حطيها على جنبك وبعدين هنجيب بولة صغيرة هنحط فيها؛ زبادي ثوم وبصل بودر وقرفة وكركم وزعتر ملح وفلفل أسود وقطرة أو قطرتين من لون الطعام الأحمر بهارات فراخ ونقلبهم مع بعض بعدين نحطهم على الفراخ المكعبات ونقلبهم كويس وسبيهم لمدة 10 دقائق بعدين في حل على النار هنحط فيها زبدة أو زيت صحي أو أي زيت زي ما تحبي ونحط فيها الفراخ بالتتبيلة ونقلبهم لغاية لما تغير لونها
نقطع عليها بصلة وقرن فلفل حار لو ما بتحبيش الحار خلاص أستغني عنه، وبعدين تروحي تكوني غاسلة الرز على حسب عدد أفراد العائلة عندك وتحطيهم على الفراخ وتقلبيهم وبعدين هتجيبي ماء وتزودي الرز بالفراخ ولكن اعملي حسابك ما تزوديش الماء كثير علشان ما يعجنش منك ويبقى مش شكلة حلو وحتي طعمة كمان تمام، بس هتسيبيه لحد لما يتشرب بعدين هتروحي موطية النار عليه خالص وهتسيبيه لغاية لما يستوي تماما وممكن تقدميهم مع أي حاجة مع سلطة مع شوربة مع لحمة مع اللي تحبية وبس وبالهناء والشفاء.
